Ümumi Tranzit Konvensiyası və Yeni Kompüterləşdirilmiş Tranzit Sisteminə dair seminar işə başlayıb
05-Dekabr-2017 177

Dekabrin 5-də Ümumdünya Gömrük Təşkilatının Bakı şəhərindəki Potensialın Gücləndirilməsi üzrə Avropa Regional Ofisində Ümumi Tranzit Konvensiyası (CTC) və Yeni Kompüterləşdirilmiş Tranzit Sisteminə (NCTS) dair seminar işə başlayıb. Seminar Avropa Birliyinin Şərq Tərəfdaşlığı Proqramı çərçivəsində Beynəlxalq Miqrasiya Təşkilatının dəstəyi ilə keçirilir.

Seminarın açılışında çıxış edən Dövlət Gömrük Komitəsinin sədri, gömrük xidməti general-polkovniki Aydın Əliyev tədbirin Azərbaycan gömrükçüləri üçün əhəmiyyətli olduğunu qeyd edib və təşkilatçılara təşəkkürünü bildirib. Aydın Əliyev vurğulayıb ki, Ümumi Tranzit Proseduru və Ticarətin Sadələşdirilməsinə dair konvensiyaya qoşulmaq Dövlət Gömrük Komitəsinin 2017-2021-ci illər üzrə fəaliyyət planındakı vacib hədəflər sırasında yer alıb. Komitə sədri hazırda Avropa məkanında tətbiq edilən NCTS –yə qoşulmaq istiqamətində atılan addımlardan, bu sistemin ölkəmiz və region üçün faydalarından bəhs edib.

Aydın Əliyev ölkəmizin tranzit imkanlarının artırılması istiqamətində Prezident İlham Əliyev tərəfindən həyata keçirilən irimiqyaslı layihələrin gələcəkdə yükdaşımaların asan və sürətli həyata keçirilməsinə münbit şərait yaradacağını, ümumilikdə beynəlxalq ticarətin inkişafına mühüm töhfə verəcəyini diqqətə çatdırıb.

Seminarda Serbiya Respublikası gömrük xidməti əməkdaşlarının ekspert qismində iştirak etməsini yüksək qiymətləndirən Aydın Əliyev Serbiyanın böyük tranzit imkanlarına malik olmaqla yanaşı, bu sahədə əldə etdiyi təcrübənin Azərbaycan üçün maraqlı nümunə olacağına əminliyini ifadə edib. Komitə sədri ötən əsrin sonlarından etibarən Azərbaycan və Serbiyanın ərazi bütövlüyü ilə bağlı problemlərlə üzləşdiyini, bu problemlərin beynəlxalq hüquq normaları çərçivəsində həlli istiqamətində iki dost ölkənin birlikdə səy göstərdiyini də diqqətə çatdırıb.

Daha sonra çıxış edən Avropa İttifaqı Üzv Dövlətlərinin Xarici Sərhədlərində Əməliyyat Əməkdaşlığının İdarə olunması üzrə Avropa Agentliyinin - Frontex-in əməkdaşı Darius Mrovic təmsil etdiyi qurum və həmin qurum tərəfindən həyata keçirilən layihələr barədə məlumat verərək bildirib ki, əsas məqsəd şəxslərin və yüklərin sərhədkeçmə prosesinin asanlaşdırılmasıdır.

Daha sonra Serbiya Respublikası gömrük xidmətinin nümayəndəsi Veselin Miloşeviç çıxış edərək, seminarda müzakirə ediləcək məsələlər barədə qısa məlumat verib və NCTS-in faydalarından bəhs edib. Veselin Miloşeviç çıxışında Kosovanın ÜGT-yə üzvlük məsələsinin müzakirəsi zamanı ölkəsinin mövqeyini dəstəklədiyinə görə Azərbaycana, Dövlət Gömrük Komitəsinə ölkəsinin hökuməti adından təşəkkürünü bildirdi.

3 gün davam edəcək seminarda Serbiya Respublikası gömrük xidmətinin əməkdaşları Veselin Miloşeviç, Olqa Protic və Vladan Vukoviç tərəfindən Serbiya tranzit sistemi, NCTS sisteminin Azərbaycanda tətbiqinin zərurətləri, NCTS-in əsas prinsipləri və faydaları, Milli Layihə Planı və digər məsələlər barədə iştirakçılara ətraflı məlumat verəcəklər.

DGK Mətbuat Xidməti