Gömrük orqanlarında xidmətə qəbul ilə əlaqədar namizədlərin
müsabiqənin müsahibə mərhələsində iştirakı haqqında
E L A N
Azərbaycan Respublikası Dövlət Gömrük Komitəsinin (bundan sonra – Komitə) ərazi və ixtisaslaşdırılmış gömrük idarələrində xidmətə qəbul ilə əlaqədar elan edilmiş müsabiqənin 2022-ci il 18 dekabr tarixdə keçirilmiş test imtahanında iştirak edərək müvəffəqiyyət əldə etmiş namizədlər aşağıda qeyd olunan istiqamətlərdən biri üzrə müsahibədə iştirak etmək üçün 2023-cü il 20 fevral saat 18:00-dək hr@customs.gov.az e-poçt ünvanına müraciət edərək qeydiyyatdan keçməlidirlər:
- Gömrük nəzarəti və gömrük xidməti üzrə
müsahibə proqramı:
ümumi proqram
sahə üzrə proqram – gömrük nəzarəti və gömrük xidməti üzrə
- Hüquqşünaslıq istiqaməti üzrə
müsahibə proqramı:
ümumi proqram
sahə üzrə proqram – hüquqşünaslıq üzrə
- İnformasiya texnologiyaları və proqram təminatı üzrə
müsahibə proqramı:
ümumi proqram
sahə üzrə proqram – informasiya texnologiyaları və proqram təminatı üzrə
Qeydlər:
- Gömrük nəzarəti və gömrük xidməti, informasiya texnologiyaları və proqram təminatı istiqamətləri üzrə bütün namizədlər müraciət edə bilərlər;
- Hüquqşünaslıq istiqaməti üzrə yalnız hüquqşünas ixtisasına malik olan namizədlər müraciət edə bilər;
- Müsahibədə iştirak etmək üçün hər bir namizədin yalnız bir istiqamət üzrə müraciəti və qeydiyyatı nəzərdə tutulur;
- Azərbaycan Respublikası Prezidentinin 2010-cu il 12 noyabr tarixli 349 nömrəli Fərmanı ilə təsdiq edilmiş “Gömrük orqanlarına xidmətə qəbul ilə əlaqədar müsabiqənin keçirilməsi Qaydası”nın 1.8-ci bəndinə əsasən test imtahanından azad edilərək birbaşa müsahibə mərhələsində iştirak edən namizədlər də eyni qaydada müraciət edirlər.
Müsahibədə iştirakla bağlı qeydiyyat üçün müraciət edən namizədlər aşağıdakı sənədləri təqdim etməlidirlər:
- müsahibə istiqamətinin seçimi haqqında müvafiq formalı ərizə (skan edilmiş);
- sağlamlıq vəziyyəti haqqında tibbi arayış (skan edilmiş);
- kadrlar uçotunun şəxsi vərəqəsi (elektron qaydada yazılmış və skan edilmiş);
Yuxarıda qeyd olunan sənədlər müəyyən olunmuş tələblərə uyğun olmadıqda, yaxud natamam olduqda qəbul edilmir və aşkar olunmuş çatışmazlıqlar namizədə izah olunur. Namizədin qeydə alınmamasına səbəb olan çatışmazlıqlar 3 (üç) iş günü müddətində aradan qaldırıldıqda, namizəd müsahibədə iştirak etmək üçün qeydə alınır. Çatışmazlıqlar 3 (üç) iş günü müddətində aradan qaldırılmadıqda, namizəd müsahibədə iştirak etmək üçün qeydə alınmır.
Namizədlərin müsahibədə iştirakı ilə bağlı qeydiyyatı üçün yuxarıda qeyd olunan müraciət müddəti bitdikdən sonra daxil olan müraciətlər qeydə alınmır.
Vətəndaşların gömrük orqanlarında xidmətə qəbul olunarkən təqdim etdiyi sənədlər və məlumatlar qanunvericiliklə müəyyən edilmiş qaydada yoxlanılır. Yoxlama nəticəsində vətəndaşın gömrük orqanlarına xidmətə qəbul olunmasına maneçilik törədən hallar müəyyən olunduqda, ona gömrük orqanlarına xidmətə qəbul olunmasından imtinanın səbəbləri barəsində yazılı formada məlumat verilir.
Namizəd qanunvericiliklə müəyyən edilmiş şərtlərə cavab vermədikdə, habelə onun tərəfindən təqdim edilmiş məlumat və sənədlərdə bilərəkdən yanlış məlumatların verilməsi aşkar edildikdə, namizədin test imtahanında və (və ya) müsahibədə əldə etdiyi nəticələr etibarsız hesab edilir.
Müsahibənin keçirildiyi vaxt və yer barədə namizədlərə müsahibənin keçirilməsinə ən azı 5 gün qalmış Komitənin internet saytı vasitəsilə məlumat veriləcəkdir.
Müsahibənin məqsədi namizədin gömrük orqanlarında işləmək üçün tələb olunan keyfiyyətlərə malik olmasını və vakant vəzifənin tələblərinə uyğunluğunu müəyyən etməkdən ibarətdir.
Hər bir namizədlə müsahibə aşkarlıq şəraitində fərdi qaydada Azərbaycan Respublikasının dövlət dilində və azı 20 dəqiqə müddətində aparılır. Müsahibə zamanı namizəd aşağıdakı meyarlar üzrə qiymətləndirilir:
- vəzifə borclarının icrası ilə əlaqədar nəzəri və Azərbaycan Respublikasının Konstitusiyasına, Azərbaycan Respublikasının qanunlarına, Azərbaycan Respublikası Prezidentinin və Azərbaycan Respublikası Nazirlər Kabinetinin aktlarına və digər normativ-hüquqi aktlarına dair biliyi;
- vəzifə borclarının icrası ilə əlaqədar nəzəri və qanunvericilik biliklərinin tətbiqi bacarığı, xarici dilləri bilməsi;
- özünü təqdimetmə bacarığı, təmkinliliyi, fikir və rəyini ifadə etmək qabiliyyəti;
- təşəbbüskarlığı, analitik düşünmə qabiliyyəti, hadisələri obyektiv qiymətləndirmək, problemlərin həlli ilə bağlı qərar çıxarmaq bacarığı.
Müsahibənin nəticəsinə görə ən çox 20 bal toplamaq mümkündür, ən azı 16 bal toplamış namizəd müsahibə mərhələsini müvəffəqiyyətlə keçmiş hesab olunur .
Müsabiqədən müvəffəqiyyətlə keçən namizədlərin sayı gömrük orqanlarında boş olan ştatların sayından artıq olduqda xidmətə qəbul edilməsi barədə qərar qəbul edilməyən namizəd Komitənin ehtiyat kadrlar siyahısına daxil edilir və 2 il müddətində vakant yer yarandıqda həmin vəzifəyə təyin edilir.
Müsahibələr Komitənin Bakı şəhəri, İnşaatçılar prospekti 2 ünvanında yerləşən inzibati binasında keçiriləcəkdir. Namizədlər müsahibələrin keçirilmə vaxtı barədə məlumatları namizədlərin müsahibədə iştirakı ilə bağlı qeydiyyatı başa çatdıqdan sonra Komitənin www.customs.gov.az saytında yerləşdiriləcək müsahibələrin keçirilməsi qrafikindən əldə edə bilərlər.
Azərbaycan Respublikasının
Dövlət Gömrük Komitəsinin
İnsan Resursları İdarəsi
Telefon: (+994 012) 404-22-00 (daxili: 0112, 0117, 0129)
e-poçt: hr@customs.gov.az