DGK əməkdaşı Yaponiyanın nüfuzlu universitetində hüquq elmləri üzrə fəlsəfə doktoru dərəcəsinə yiyələnib

2021-2025-ci illər üzrə tədris proqramı çərçivəsində Yaponiyanın Kanazava Universitetində təhsil alan Dövlət Gömrük Komitəsinin əməkdaşı Rövşən Namazov hüquq elmləri üzrə fəlsəfə doktoru (PhD - Doctor of Philosophy in Law) dərəcəsinə yiyələnib. Rövşən Namazovun tədqiqat sahəsi ən yaxşı təcrübələrin araşdırılması əsasında Azərbaycanda “Sərnişinlərə dair ilkin məlumat (API) və Sərnişin adlarının qeydiyyatı (PNR)” sistemlərinin inkişaf etdirilməsi mövzusu ilə bağlı olub. Tədqiqat xüsusilə hüquqi, institusional, texniki və əməliyyat yönümlü təcrübələrin ətraflı araşdırılması və milli təcrübəyə inteqrasiyası imkanlarının nəzərdən keçirilməsi istiqamətində nəticə və tövsiyələri özündə əks etdirməkdədir.

Qeyd edək ki, Rövşən Namazov Kanazava Universitetində Yaponiya Dövlət Təqaüd Proqramının ( MEXT) qalibi olaraq tam təqaüdlə təhsil alıb.

150 illik tarixə malik Kanazava Universiteti Yaponiyada ən reytinqli dövlət universitetlərindən biri olmaqla beynəlxalq və milli səviyyədə fəaliyyət göstərən araşdırma yönümlü təhsil müəssisəsidir. 2014-cü ildə dünya üzrə ən yaxşı universitet layihələrinin qalibi seçilib, 2016-cı ildə dünyada “Ən yaxşı təhsil və araşdırma proseslərini təşviq etmə” kateqoriyası çərçivəsində “Ən yaxşı qlobal universitetlər” siyahısına daxil olub. 2017-ci ildə isə “Dünyanın ən ali beynəlxalq araşdırma mərkəzi təşəbbüsü” layihəsinin qalibi seçilib.

Rövşən Namazov magistratura təhsilini də  2016-2017-ci illərdə Yaponiyanın Aoyama Gakuin Universitetində “Biznesin təşkili və idarə edilməsi” sahəsi (MBA - Master of Arts in Business Administration) üzrə alıb.

DGK Mətbuat və İctimaiyyətlə Əlaqələr İdarəsi