Könüllü gömrükçü
Dövlət Gömrük Komitəsində könüllü fəaliyyət göstərmək istəyən gənclərin nəzərinə!
“Könüllü fəaliyyət haqqında” Azərbaycan Respublikasının Qanununa və “Dövlət Gömrük Komitəsinin sistemində könüllü fəaliyyətin təşkilinə dair Metodika”nın təsdiq edilməsi haqqında Azərbaycan Respublikası Dövlət Gömrük Komitəsi sədrinin sərəncamına əsasən gənclərin fərdi inkişafına təkan vermək, onlarda sosial məsuliyyət hissini artırmaq, gəncliyin potensialından səmərəli istifadə etmək məqsədilə Dövlət Gömrük Komitəsində könüllü fəaliyyətə cəlb edilmiş gənclərdən “Könüllü gömrükçü” dəstəsi formalaşdırılır.
“Könüllü gömrükçü” dəstəsinə gənclərin cəlb edilməsi məqsədilə Komitə tərəfindən müsabiqə elan edilir. Müsabiqədə iştirak etmək istəyən ali təhsil müəssisəsində təhsil alan və ya ali təhsil müəssisəsini bitirmiş gənclər (18-29 yaş) 30 yanvar 2025-ci il tarixindən 6 fevral 2025-ci il tarixinədək qeydiyyatdan keçə bilərlər.
Qeydiyyatdan keçən gənclərin müraciətlərindən ibarət “Ehtiyat könüllü bazası” yaradılır. “Könüllü gömrükçü” dəstəsinə üzvlər müraciətetmə ardıcıllığı nəzərə alınmaqla müsahibə əsasında “Ehtiyat könüllü bazası”ndan seçilirlər. Seçim zamanı təhsili üzrə ümumi orta müvəffəqiyyət göstəricisi yüksək olan, xarici dil bilən və ofis proqramlarından istifadə bacarığı olan, habelə ünsiyyətcil, işgüzar, təşkilatçı və təşəbbüskar namizədlərə üstünlük verilir.
Müsahibələrin 7 fevral 2025-ci il tarixindən etibarən Komitənin inzibati binasında keçirilməsi nəzərdə tutulur.
Müsahibədən uğurla keçən gənclərlə Komitə arasında üç ay müddətinə müqavilə bağlanılır. Onlar Komitənin Aparatı və strukturuna daxil olan ərazi və ixtisaslaşdırılmış gömrük idarələrinin struktur bölmələrində, habelə digər qurumlarında könüllülük fəaliyyətinə cəlb olunur. Könüllülər xüsusi geyim dəsti ilə təmin olunur, habelə onlara etik davranış, geyim formasının daşınma, informasiya təhlükəsizliyi, daxili nizam-intizam qaydaları, gömrük orqanlarının hüquq və vəzifələri və digər mövzular üzrə təlimlər təşkil olunur.
Könüllülərlə fəaliyyətin səmərəliliyini və səviyyəsini daha da artırmaq məqsədi ilə onların fəaliyyəti qiymətləndirilir və qiymətləndirmənin nəticəsinə uyğun olaraq könüllülərə sertifikat təqdim edilir.
Komitədə könüllülük fəaliyyəti ilə bağlı “Könüllü gömrükçü” dəstəsinin sosial şəbəkə hesabları vasitəsilə əlavə məlumat əldə etmək olar.
Könüllü gömrükçülərin Facebook səhifəsi