Pirotexniki vasitələri gömrükdən gizlətmək cəhdi alınmadı

Qərb Ərazi Baş Gömrük İdarəsi Əməliyyat və Təhqiqat İdarəsinin Əməliyyat şöbəsinə daxil olan məlumat əsasında, "Qırmızı Körpü" gömrük postunda Gürcüstandan idarə etdiyi avtomobillə gələn Azərbaycan vətəndaşı saxlanılıb.

Sorğu-sual zamanı vətəndaş nəqliyyat vasitəsində gömrük nəzarətindən gizlədilən və ya bəyan edilməyən hər hansı predmetin olmadığını bildirib. Baxış zamanı isə avtomobilin döşəməsindəki xüsusi düzəldilmiş gizli saxlanc yerində 510 qutu "Demi Wolf" və "Whistling Moon Travellers" markalı pirotexniki vasitələr aşkar olunub.

Faktla bağlı araşdırma aparılır.

DGK Mətbuat və İctimaiyyətlə Əlaqələr İdarəsi