Narkotik vasitə və psixotrop maddə aşkarlandı

Cənub Ərazi Baş Gömrük İdarəsinin “Astara” gömrük postunda “Hovo” markalı yük nəqliyyat vasitəsi gömrük nəzarətindən keçərkən saxlanılıb, avtomobilin sürücüsü şifahi sorğu-sual edilib.

Sorğu-sual zamanı sürücü üzərində və idarə etdiyi nəqliyyat vasitəsində gömrük nəzarətindən gizlədilən və bəyan edilməyən hər hansı predmetin, o cümlədən narkotik və psixotrop maddələrin olmadığını bildirib.

Gömrük nəzarəti zamanı tətbiq edilən kinoloji xidmət iti avtomobilin kabinəsinə reaksiya verib və yük nəqliyyat vasitəsində əsaslı yoxlama aparılıb.

Nəticədə yük avtomobilinin kabinəsində olan idman çantasından 3 ədəd bükümdə, ümumi çəkisi  1,8   qram təşkil edən psixotrop maddə-metamfetamin, həmçinin kabinənin tavan hissəsində əşyaların qoyulması üçün nəzərdə tutulmuş yeşikdən 120 ml-lik plastik qabda, ümumi həcmi 80 ml təşkil edən narkotik vasitə-metadon aşkar edilib.

Sürücünün üzərində aparılan şəxsi yoxlama zamanı  isə 1 ədəd bükümdə,  ümumi çəkisi  0,4   qram təşkil edən psixotrop maddə-metamfetamin aşkar olunub.

Xatırladaq ki, metamfetamin "Azərbaycan Respublikasının ərazisində dövriyyəsi qadağan edilən psixotrop maddələrin I Siyahısı"na daxildir.

Faktla bağlı araşdırma aparılır.

DGK Mətbuat və İctimaiyyətlə Əlaqələr İdarəsi