“Xanoba” dövlət sərhədindən buraxılış məntəqəsinin açılış mərasimi olub
“Xanoba” dövlət sərhədindən buraxılış məntəqəsinin açılış mərasimi olub
Martın 17-də Azərbaycan Respublikasının Rusiya Federasiyası ilə sərhədində yenidən inşa olunan “Xanoba” dövlət sərhədindən buraxılış məntəqəsinin açılış mərasimi olub.
Qeyd edək ki, “Xanoba” dövlət sərhədindən buraxılış məntəqəsində tikinti işləri Azərbaycan Respublikasının Prezidenti cənab İlham Əliyevin sərəncamına əsasən həyata keçirilib.
Açılış mərasimində Azərbaycan Respublikası Baş nazirinin müavini Şahin Mustafayev, Rusiya Federasiyası Baş nazirinin müavini Aleksey Overçuk, Dövlət Gömrük Komitəsinin sədri, gömrük xidməti general-leytenantı Şahin Bağırov, Dağıstan Respublikası Hökumətinin sədri Abdulmüslüm Abdulmüslümov və digər rəsmi şəxslər iştirak ediblər.
İlk olaraq Xaçmaz şəhərində ümummilli lider Heydər Əliyevin abidəsi ziyarət edilib, önünə əklil qoyulub.
Sonra “Xanoba” dövlət sərhədindən buraxılış məntəqəsində yenidən inşa edilən infrastrukturun açılışı olub.
Rəmzi qırmızı lenti kəsən nümayəndə heyətinin üzvlərinə məlumat verilib ki, layihənin ümumi sahəsi 6.85 hektar, yaşıllıq əraziləri 3331.7 m2, tikililərin sahəsi 20104.23 m2, buraxılış məntəqəsinin sahəsi isə 22000 m2-dir.
Açılış mərasimində çıxış edən Baş nazirin müavini Şahin Mustafayev iki ölkə arasındakı bütün sahələrdə səmərəli və işgüzar əməkdaşlığın qurulduğunu, Azərbaycanın əsas ticarət tərəfdaşlarından biri olan Rusiya Federasiyası ilə iqtisadi-ticarət əlaqələrinin inkişaf etdiyini, nəticədə ötən il ticarət dövriyyəsinin 3,7 milyard dollara çatdığını bildirib. Şimal-Cənub nəqliyyat dəhlizi üzrə ölkələrimiz arasındakı səmərəli əməkdaşlıqdan, Azərbaycan tərəfinin yol infrastrukturunun yenidən qurulması, logistika imkanlarının genişləndirilməsi istiqamətində həyata keçirdiyi tədbirlərdən danışan Ş.Mustafayev yenidən inşa olunan “Xanoba” dövlət sərhədindən buraxılış məntəqəsinin sərhədkeçmə proseslərinin sürətləndirilməsi, yükdaşımaların artırılması, nəqliyyat və sərnişin axınının səmərəli şəkildə tənzimlənməsində əhəmiyyətli rol oynayacağını diqqətə çatdırıb.
Rusiya Federasiyası Baş nazirinin müavini Aleksey Overçuk bildirib ki, bizim ölkələr qarşılıqlı əməkdaşlığı inkişaf etdirməkdə maraqlıdır.
“Xanoba” dövlət sərhədindən buraxılış məntəqəsinin Şimal-Cənub nəqliyyat dəhlizinin qurulması işində açar rolunu oynadığını vurğulayan Aleksey Overçuk qeyd edib ki, hazırda sözügedən dəhliz boyu avtomobil nəqliyyatı infrastrukturu formalaşıb, perspektivdə dəmiryol nəqliyyatı infrastrukturunun inkişafının müzakirəsi də var.
Dövlət Gömrük Komitəsinin sədri Şahin Bağırov beynəlxalq standartlara uyğun şəkildə inşa edilən, Şimal-Cənub dəhlizi üzərində yerləşən “Xanoba” dövlət sərhədindən buraxılış məntəqəsinin hər iki ölkənin idxal-ixrac imkanlarını daha da genişləndirəcəyini diqqətə çatdırıb. O da vurğulanıb ki, Azərbaycan və region üçün strateji önəmə malik “Xanoba” dövlət sərhədindən buraxılış məntəqəsinin əhəmiyyəti daha da artacaq.
Dağıstan Respublikası Hökumətinin sədri Abdulmüslüm Abdulmüslümov isə Dağıstan və Azərbaycan arasında sıx əməkdaşlıq münasibətlərinin, xüsusilə də möhkəm ticarət-iqtisadi əlaqələrin qurulduğunu deyib, Azərbaycanın Dağıstanın əsas ticarət tərəfdaşlarından biri olduğunu vurğulayıb.
Qeyd edək ki, “Xanoba” dövlət sərhədindən buraxılış məntəqəsində gün ərzində hər istiqamət üzrə 550-dən artıq yük və 1000-dən artıq minik nəqliyyat vasitəsinin, 30-dan artıq avtobus və 5000 nəfərədək fiziki şəxsin gömrük sərhədindən keçidi nəzərdə tutulub.
Dövlət sərhədindən buraxılış məntəqəsində nəqliyyat vasitələrinin hərəkəti üçün 13 keçid xətti müəyyən olunub. Bu da yük, avtobus və minik nəqliyyat vasitələri üzrə sərhəd və gömrük nəzarətinin sürətli qaydada aparılmasına əlverişli şərait yaradır. Nəqliyyat vasitələrinin sərhəd və gömrük qeydiyyatı, eləcə də ilkin baxış buraxılış məntəqəsində aparılmaqla digər zəruri rəsmiləşdirmə əməliyyatları terminalda həyata keçiriləcək.
DGK Mətbuat və İctimaiyyətlə Əlaqələr İdarəsi