Yaponiya Beynəlxalq Əməkdaşlıq Agentliyinin nümayəndə heyəti ilə görüş keçirilib

Yaponiya Beynəlxalq Əməkdaşlıq Agentliyinin (JİCA) Araşdırma Missiyası Orta Dəhliz üzrə logistika imkanlarını araşdırmaq məqsədilə ölkəmizdə səfərdədir.

İyunun 16-da Dövlət Gömrük Komitəsində Yaponiya Beynəlxalq Əməkdaşlıq Agentliyinin Şərqi, Mərkəzi Asiya və Qafqaz Departamentinin Mərkəzi Asiya və Qafqaz şöbəsinin direktoru Gasavara Kenjinin rəhbərlik etdiyi nümayəndə heyəti ilə görüş keçirilib.

Dövlət Gömrük Komitəsi sədrinin müavini Natiq Şirinov Azərbaycan gömrük xidmətinin təşəbbüsü ilə hazırlanan Orta Dəhliz boyu tranzit gömrük prosedurunun sadələşdirilməsi layihəsinin əhəmiyyəti, Transxəzər Rəqəmsal Tranzit Portalının yaradılması istiqamətində görülən işlər barədə qonaqlara məlumat verib.

Görüşdə Mərkəzi Asiya və Cənubi Qafqaz arasında Xəzər dənizi marşrutu üzrə logistika vəziyyəti təhlil edilib, əlaqəli ölkələrlə əməkdaşlıq imkanları nəzərdən keçirilib.

Yekunda qarşılıqlı maraq doğuran məsələlər ətrafında fikir mübadiləsi aparılıb.

DGK Mətbuat və İctimaiyyətlə Əlaqələr İdarəsi